A gran lafoul ti ralye dan Stad Popiler pour fet nou kreolite pandan louvertir 31enm Festival Kreol yer swar.
Sa levennman ti osi koensid avek Lazournen Enternasyonal Kreol ki selebre le 28 Oktob.
Prezan pandan sa seremoni ti Prezidan Larepiblik Danny Faure, Vis-Prezidan Vincent Meriton, Minis Dezinyen Macsuzy Mondon, Spiker Lasanble Nasyonal Patrick Pillay, lider zafer gouvernman dan Lasanble Nasyonal Charles De Commarmond, bann manm Lasanble Nasyonal, plizyer o zofisye gouvernman ek envite distenge.
Sa sware ti konmans avek en lorkes kreol swivi par larantre laserenad ver 6er15.
Zenn konman bann dimoun aze ti’n met zot lenz tradisyonnel miltikolor e zot ti dans nou bann sanson tradisyonnel ki ti pe ganny zwe par en benn lokal.
Ti annan bann rakonter Seselwa, Rodrige ek Morisyen ki ti partaz zot bann pti zistwar avek lafoul e osi lo listwar Lazournen Enternasyonal Kreol kree par Lasosyasyon Bann Zil Kreol.
Pandan diskour ofisyel, Minis pour Tourizm ek Kiltir Msye Alain St Ange ti dir ki atraver sa louvertir nou pe pas atraver en lafet ki mark sa ki nou ete.
«Nou sa pep kreol Seselwa e osi avek nou bann envite ki sorti dan larezyon e menm pli lwen dan Karaib ki isi pour fer en keksoz – met annavan kreolite bann zil ek kreolite sa pep ki santi li en kreol,» Minis St Ange ti dir.
I ti dir ki nou kreol i devret enn bann pwen for ler nou tou nou ralye pour dir avek bokou lafyerte ki nou reste dan tou nou diversite pep kreol.
«Semenn ek Lafet Kreol i pour tou Seselwa, i pa pour departman kiltir, alor annou kontinyen siport sa lafet ki inifye nou, ki fer nou realize ki nou en pep avek en kiltir ki viv dan en pei,» i ti dir.
Konman minis responsab pour kiltir e prezidan komite lorganizasyon Festival Kreol, Minis St Ange ti remersye Prezidan Faure, tou Seselwa ki’n desann e tou bann artis, mizisyen ek danser.
Pandan seremoni, Minis St Ange avek Patrick Victor ti devwal 
premye gitar ki’n ganny fer avek en baz koko-d-mer apele ‘Gitar Koko Sesel’.
Minis St Ange ti fer kado Prezidan Faure enn sa gitar konman souvenir apre Msye Victor ti annan loner pour zwe sa gitar pour en premye fwa.
Apre diskour prononse par Minis St Ange, ti annan plizyer performans ladans tel ki masezarin, madilo, moutya, kanmtole e tou ti fini par en pipili kreol.
Louvertir ti swiv par en spektak rezyonal avek bann santer ek benn Seselwa, Morisyen, Rodrige ek Reinyonnen tel ki Island Vibration, Denis Gaspar ek son group, Tine Poppy ek son group ek Latroup Grodin.
Nou prezant zot serten portre tire par Louis Tousaint pandan seremoni yer swar.
Source : Seychelles NATION