Dan kad bann aktivite pour konmemor 31enm Festival Kreol nou bann vwazen sorti Rodrig ek Larenyon ti donn en performans ekstraordiner dan Sant Konferans Enternasyonal (ICCS) Merkredi swar.
Group Rodrige ti enterpret en pyes teat renonmen par William Shakespeare apele Enn swar été (A midsummer night’s dream) ki’n ganny tradwir an kreol e ganny adapte pour zil Rodrig.
Sa lekip 15 Rodrige ti prezant sa komedi ki ti dir pour 1erdtan 20 minit.
Sa pyes teat ti enkilke parfen Rodrig avek bann sanson tradisyonnel sa zil e i menm mansyonn Sesel dan son spektak kot de lanmoure ti pe sove pour vin reste.
Meter-an-senn, Anon Panyandee, ti dir ki zot in pran omwen nef mwan pour travay lo sa pyes teat avan zot vin Sesel.
“Nou ti anvi montre ki nou kapab demontre en pyes renonmen fer par Shakespeare atraver bann sanson tradisyonnel Rodrig e menm i pa premye pyes ki ganny tradwir an kreol me dan sa stil la ki nou’n fer li adapte dan en laspe pour Rodrig, sa i premye fwa,” i ti dir.
Group Renyonnen ti perform en morso mizikal avek tit Vavangère(s) kot zot ti fer demonstrasyon lanmizik ek lapoezi ki ti dir pour 1erdtan 15 minit.
Zot ti melanz bann lenstriman tradisyonnel avek bann ki modern pour fer bann morso poenm, rap ek lanmizik tradisyonnel.
Bann portre ki akonpanny lartik i montre enn de moman for sa performans teatral ek mizikal.
Source : Seychelles NATION