Lekol Praslin segonder i gannyan konkour diskour pour bann lekol.
Final sa konkour ki Lenstiti Kreol i organize tou le lannen dan kad Festival Kreol ti fer yer apremidi dan oditoryonm Lenstiti Pour Formasyon bann Ansennyan (Site), Mont Fleuri.
Lekip lekol Praslin segonder ti konpri Ezra Bistoe, Shamina Victor ek Jean-Yves Lesperance.
Tenm ki zot ti’n swazir pour koz lo la ti ‘Bes ou mank motivasyon dan milye skoler’ kot zot ti esey montre lakoz sa problenm, son bann konsekans e osi propoz solisyon.
Shamina Victor ti osi ranport pri pour pli bon kozer. Pli bon prezantater ti Corina Constant sorti lekol Beau Vallon alor ki pri pour pli bon lokiter prensipal ti al pour Kelly Francoise sorti Plaisance segonder.
Se lekol Beau Vallon ki ti ranport dezyenm pri an zeneral, alor ki trwazyenm pri ti al pour lekol Plaisance. Lot finalis, lekol Rivière Anglaise, ti sorti katriyenm.
Bann pri ti prezante par Msye Darrel Antat, en reprezantan Lotorite Laviasyon Sivil (SCAA) ki en partener fidel Lenstiti Kreol e ki’n sponsor sa konpetisyon.
Source : Seychelles NATION