31enm Festival Kreol-Final Konpetisyon Kwiz Kreol Enterskoler/Enterdistrik

Lekol segonder Pointe Larue, distrik Les Mamelles i ankor en fwa meyer

Pour en 3^enm lannen konsekitif lekol segonder Pointe Larue in montre son siperyorite dan tou laspe nou kreolite apre ki zot ti bat Praslin segonder 42 lo 19 dan final Konpetisyon Kwiz Kreol Enterskoler ki ti fer yer dan oditoryonm Lenstiti Pour Formasyon bann Ansennyan (Site), Mont Fleuri.

Lo nivo distrik se en lekip sorti Les Mamelles ki pour en 5enm lannen konsekitif in balye tou bann pri apre ki i’n bat Roche Caiman 50 lo 20.

Pour sa lannen se lekol segonder Beau Vallon ki’n sorti dan 3^enm plas e lo nivo distrik se Grand Praslin.

Sorti lekol Pointe Larue ti en lekip tre konfidan e determinen konpoze par Karl Gedeon, Nelly Dogley, Shania Joseph ek Elma Balette ki ti fer fas a en lekip Praslin segonder pli timid e mwen konfidan konpoze par Gaelle Rene, Valencia Gendron, Kiran Bhaggeerutty e Emmelynne Lesperance.

Depi premye seri kestyon Pointe Larue in pran kontrol e demontre zot gran konnesans zeneral nou lalang, nou kiltir, listwar, zedmo ek lezot.

Karl Gedeon, en etidyan S1 dan sa lekip, ti skor plis pwen dan sa final osi byen ki dan eliminasyon.

Bann pri pour toulede final – enterskoler ek enterdistrik – in parey tou le lannen finanse par Lotoritite Laviasyon Sivil Sesel (SCAA) e se reprezantan sa lotorite Madanm Jean Hassan ki ti prezant pri avek bann gannyan.

Apre ki bann gannyan ti’n resevwar zot pri e bann lekol ki ti partisipe  ti’n resevwar en sertifika, Karl Gedeon, sa zenn garson ki ti’n kontribye bokou pour anmenn son lekol ver laviktwar ankor en fwa, ti eksprim son lakontantman.

“Mon vreman kontan e fyer e mon remersye mon paran pour tou sa ki mon’n aprann. Tou sa bann keksoz si mon konnen se gras a zot e mon fer sir ki mon gard tou antet e mon pa bliye,” Karl ti dir.

I ti azoute ki i’n osi aprann bokou lo lalang kreol avek son granmanman e i ti profite pour remersye zot tou bokou.

I ti dir ki ansanm avek son lekip zot in byen prepar zot pour sa final e zot vreman kontan.

Lo kote enterdistrik, lekip Les Mamelles ti konpoze par Isabelle Joubert, Claude Philoe, Elise Charles ek Sheena Boniface tandis ki Jamilah Hibonne, Sylvie Philoe, Edouard Leon e Paul Dupres ti form parti lekip Roche Caiman.

Fodre dir ki Msye Claude Philoe in dan sa lekip pour plizyer lannen e son konnesans kreol dan tou son laspe pe kontinyen sirprann lodyans. I pa’n a okenn moman les okenn pwen perdi e i’n partisipan ki’n ranport plis pwen pour son lekip dan sa final.

“Mwan mon’n toultan en dimoun ki pasyonnen par bann dikton, zedmo, kiltir … e tou keksoz ki annan pour fer avek nou kreolite. Mon kontan koz ek bann dimoun aze, mon kontan lir bann zistwar kreol ki sorti e dan mon bann resers lo kreol mon aprann bokou e mon pa zanmen bliy nanryen,” Msye Philoe ti dir.

I ti azoute ki i pou kontinyen partisip dan kwiz sak lannen. Alor avek sa kalite konnesans ekstraordiner bann lekip sorti dan bann distrik zot bezwen prepar zot si zot oule met en fren avek Les Mamelles dan prosen konpetisyon.

Apre ki zot ti’n resevwar zot pri avek Madanm Hassan, sa lekip Les Mamelles ti fer en don Madanm Erica Fanchette, prezantatris sa konpetisyon pour plizyer lannen, apre ki i ti perdi son lakaz e tou sa ki i posede dan en dife semenn pase.

Konpetisyon kwiz kreol i organize par Lenstiti Kreol dan kad aktivite pour selebre Festival Kreol sak lannen.

SCAA i finans tou bann pri e komite Festival Kreol i finans staz eliminatwar.

Source : Seychelles NATION