En koup Alman – Klaus ek Tatiana – ti dir ‘Wi’ an kreol, dan en vre dekor ek lanbyans maryaz tradisyonnel Seselwa – laserenad, romans, diskour, zet bouke, eksetera.
Zot ti fer sa atraver ‘Tifin’, en aktivite ki’n fini pran son plas lo progranm Festival Kreol.
Sa mo ‘Tifin’ i vedir bann pti manzay ki konmela nou apel snack. Nou gran paran ti konsonm tifin avek zot dite apremidi. Me tradisyonnelman, Tifin ti osi prezan dan bann lafet tel ki lanniverser, premyer kominyon, lakonfirmasyon, fiansay ek maryaz.
Prezan dan sa maryaz Tifin ki ti deroul Dimans apremidi dan sant kominoter Beau Vallon, ti Minis pour Tourizm ek Kiltir, Alain St Ange, sekreter prensipal pour kiltir Benjamine Rose ek lezot envite.
Jessie Freminot, ki’n organiz sa aktivite pandan sa senk dernyen lannen, ti fer resorti ki zot in deside reviv maryaz tradisyonnel atraver ‘Tifin’.
«Tifin ti ler ban trwazyenm-az ti zwenn pour pran en tas dite akonpannyen avek gato kreol ek konfitir papay tournen. Avek letan sa koutim in pti a pti evolye. E ozordi ki meyer fason pour fer reviv maryaz tradisyonnel atraver sa aktivite,» i ti dir.
Source : Seychelles NATION