Klib Mize Listwar Natirel in ofisyelman lans son progranm aktivite pour sa lannen.
Sa ti deroul dan en pti seremoni ki ti fer Sanmdi le 25 Fevriye 2017 dan prezans
bann etidyan serten lekol primer ek segonder, bann manm aktyel Klib Mize, ansennyan Wildlife Club e osi en group trwazyenm-az distrik Bel Air ek bann liders SNYC (Konsey Nasyonal Lazenes) ki travay avek lazenes dan distrik.
Letan i ti pe adres bann envite, Madanm Beryl Ondiek, direkter Mize Nasyonal, ti dir ki Mize Listwar Natirel in antre dan en nouvo fason travay kot Mize i devret al ver lakominote e ogmant plis vizibilite.
« Ledikasyon i en koponan tre enportan dan en mize, ki ede pour anrisir konnesans, respe e anplifye valer anver nou zenn zenerasyon vizavi prezervasyon nou leritaz natirel. Atraver sa ledikasyon i permet zenn war sans pour protez nou lanvironnman natirel e annan konpasyon pour bann diferan lespes vivan, » i ti dir.
« Bann partisipan in vin bann aksyonner nou lanvironnman e zot dan en pozisyon pour defann nou biodiversite ki vreman sansib, » i ti azoute.
I ti demann bann ki ti la prezan pour fer li zot devwar pour zot vin enn sa defanser nou leritaz natirel.
I ti demann bann zanfan prezan pour retourn dan lakour, dan lekol e dan lakominote avek rezon akoz nou bezwen respe e valoriz leritaz natirel nou pei.
I ti met lanfaz lo ‘Family Fun Day at the Museum’, ki en ativite ki mize pe entansifye lo la vi ki sa lannen Prezidan in deside pour lans en Minister Lafanmiy.
I pou le moman kot fanmiy i kapab vin bann aktivite ansanm tou le Sanmdi lafendimwan.
Direkter Mize in lans lapel avek tou sekter dan lasosyete pour travay ansanm pour kapab atenn tou sa lobzektif.
Madanm Nicole Barreau ki ansarz ledikasyon dan mize, ti prezant son progranm pour sa lannen, e osi tras lakonplisman ledikasyon mize pandan sa dernyen 5-an.
I ti fer resorti ki 2016 ti en lannen rikord an term lakantite zanfan ek ansennyan ki’n vizit mize.
Bann ki ti prezan ti osi kapab war aktivite ki’n deroule pandan 2016.
Madanm Barreau ti osi lans en lapel pour lakominote vin servi mize otan ki posib akoz i en landrwa kot zanfan konman adilt i aprann.
Apre prezantasyon ti annan lanrezistreman bann zanfan ki anvi zwenn Klib Mize.
Mize Listwar Natirel i kont lo partisipasyon tou sa ki ti prezan e osi son minister pour fer sa progranm en sikse pour lannen 2017.
Source : Seychelles NATION