Senkyenm edisyon ‘Sesel Enspir Mwan’ ti lanse ofisyelman Vandredi swar atraver en spektak lanmizik, sanson ek poenm dan oditoryonm Liniversite Sesel, Anse Royale.
Sete bann zenn ki ti fer pli byen dan katriyenm edisyon sa konpetisyon lannen pase ki ti perform dan sa spektak devan lezot kanmarad zenn, enkli bann ki ti sorti Vilaz Prezidan, ki ti’n vin ranpli lasal pour ekout zot. Parmi ti annan Kelly Mathiot, duo Michelle Pool ek Angelo Adrienne ki ti venker dan kategori sanson 15 a 17-an lannen pase; Alisha Ernesta dan kategori 18 a 24-an e Christiana Alexis e Davis Finesse pour kategori 25 a 30-an. Christiana ti osi resevwar en kado avek son bann zanmi dan lasal. Ti osi annan partisipasyon bann zenn artis tel ki ‘GAZA Production’, ‘Malgas, ‘Richie B’, bann ‘stage name’ byen koni parmi bann zenn.
Konpetisyon ‘Sesel Enspir Mwan’ i organize par Konsey Nasyonal Lazenes (SNYC) pour bann zenn aze 15 a 35-an e atraver sa konpetisyon zot kapab montre ki mannyer Sesel i enspir zot atraver plizyer form lar tel parey lapoezi, lapentir, zistwar ek sanson.
Bann gannyan pou ganny pri larzan e sa ki’n fer pli byen pou osi benefisye avek voyaz artistik aletranze letan i posib.
Prezan kot spektak Vandredi swar ti Alvin Laurence, sef egzekitif SNYC, ek son depite Ghislaine Belmont.
“I pa ti en spektak long me en spektak kot nou’n retras enpe parkour bann ki’n fer pli byen, bann ki’n kit zot mark dan en fason spesyal lo ‘Sesel Enspir Mwan’,” Myse Laurence ti dir ler i ti ofisyelman lans sa sekyenm edisyon.
Sa lannen dat limit pour bann zenn soumet zot travay i le 30 Zen 2017.
Source : Seychelles NATION