“Sa pri Mis Kreol in anmenn en diferans dan mon lavi e mon santi mwan pli pre avek tradisyon Kreol,” Omegan Jean-Marie Ciseau in dir.
I tir fer sa komanter alafen seremoni donn pri konkour labote Mis Kreol ki ti deroul kot lotel Treasure Cove, Bel Ombre pli boner sa mwan.
Parmi bann envite kot sa seremoni ti Minis pour Lazenes, Spor ek Kiltir, Idith Alexander; sekreter prensipal pour kiltir, Benjamine Rose ek reprezantan bann sponsors.
Propriyeter sa lotel Marie-France MacGregor in donn Terry Carolla, responsab lorganizasyon sa konkour, lasirans ki “lannen prosen mon pou ed plis ki mon’n ede sa lannen”.
Pandan sa sware, ki ti animen par santer e mizisyen veteran Sedrick Marengo akonpannyen par Telsy, bann kontestan ti ganny zot pri ki ti ganny remet par reprezantan bann sponsors parey Fidelity Insurance, Restoran Delplace, Ethiopian Airline, Cable & Wireless, diskotek Katiolo, Virginie’s Beauty Parlour, lotel Treasure Cove, Alliance Française, Tropical Heat Gym, Chez Ketseen, Restoran Moloko, Intelvision, Onorab Chantal Ghislain, Onorab Regina Alcindor, Lorganizasyon Mis Kreol, Heaven’s Beauty and Spa, Moonshine ek Takamaka Bay.
Nou ava rapel ki se Omegan Jean-Marie Ciseau ki ti ranport pri Mis Kreol 2016 e sa etidyan Lekol Letid Biznes ek Kontabilite in dir ki apre ki i’n ganny sa tit i pa’n ezite pour montre son talan dan ladans lokal e kontinyen vann fler dan bazar e lezot landrwa lo Mahé avek son manman Cecilia Ciseau.
“Mon en fiy Kreol e fyer pour sa ki mon ete,” i ti dir zournal Seychelles NATION.
I’n osi azoute ki apre ki i termin son letid i ti a kontan zwenn son manman dan son biznes vann fler.
Dezyenm an zeneral dan sa konkour ti Romakira Gonthier ki ti osi ganny pri pour swa bann spektater (People’s Choice). Trwazyenm plas ti al pour Elissa Larue e se li menm ki ti ganny pri pour pli zoli rob sware (best evening wear) tandis ki Melanie Sinon ti ganny pri pour pli bon personalite (Miss Personality).
Msye Carolla in remersye tou sponsors ki ti reponn prezan pour sa konkour labote ki ti ganny organize dan lespas en mwan e i’n dir ki lannen prosenn son lobzektif se “anmenn bann fiy sorti dan lezot zil Losean Endyen pour partisip dan sa konkour labote”.
Pour fer li pli enteresan, Madanm MacGregor in dir “mon asire ki se en Seselwaz ki pou ganny premye pri”.
Source : Seychelles NATION