Voyaz’, en resital poenm, zistwar ek sansonpar artis Seselwa osi ki bann envite sorti dan lezot zil kreolofonn, in vin en aktivite tradisyonnel e byen apresye lo progranm Festival Kreol.
I pa ti en leksepsyon sa lannen, kot ti en lanbyans detant dan zarden e lo peron grann kaz Domaine Val des Près Sanmdi swar.
Sa aktivite ti osi koensid avek reouvertir Restoran ‘Pomme Cannelle’. Pour sa lokazyon, Domaine Val des Près ti’n retrouv son zoli dekor ek lalimyer ki reflekte alafwa zwa de viv Kreol e romantizm ki karakteriz sa ansyen demer kolonyal. Douser lapwezi ti’n vin trankilman mel dan sa latmosfer pour ofer en zoli lanbyans; kalm me ekstraordiner.
Sa piblik atantif ki ti’n reponn lapel ti osi kapab apresye en legzibisyon tradisyonnel dan grann kaz, osi ki en bon dinen Kreol.
Marie Clarisse, Georgette Larue ek Edwin Henriette, trwa poet sorti dan lasosiasyon ekriven Seselwa ‘Lardwaz’, ti dir ki « Nou lalang i annan rezon » e anmenn lodyans dan en voyaz alafwa natirel e rever.
Trwa zenn ki zot zot sorti dan lasosiasyon Leritaz Takamaka, ti mark sa relasyon enterzenerasyon e montre lavenir lapwezi Seselwa. Lyza Savy, Daryl Hibonne ek Stephen Michel ti resit sis poenm Michel Savy, poet ki osi sorti Takamaka.
Sis madanm sorti dan Klib Leritaz ti lo zot kote rakont e ilistre kont Jean de La Fontaine, ‘Le corbeau et le renard’. Sa ti Micheline Mata, Chantal Mussard, Miren Mousbé, Lucille Fostel, Maryse d’Offay ek Egla Laudelout.
Bann artis larezyon ti konpri kontez Rodrigez Claudette Gaspard ki kapab koz avek plizyer lavwa e Morisyenn Daniella Bastien ki akonpanny son poenm avek son ki i prodwir lo son ravann.
Sa zoli sware lavey nouvel lin ti fini avek en moman mizikal avek benn ‘Melodious’ sorti Maurice, Norville Ernesta ek son group moutya e Mervin Camille ek son group ki osi konpri François Larue, Peter Jules ek Cyril Vital.
Nou prezant zot serten moman for sa sware atraver nour seri portre tire par Michel Savy.
Source : Seychelles NATION