Santez popiler Sandra in fer en pti kontribisyon finansyel anver Lasosiasyon Cancer Concern (CCA).
Sa kontribisyon in posib an rezilta en spektak ki sa santez ti fer de trwa semenn pase e kot i ti lans son nouvo albonm ki apel ‘Mon parkour’.
Bann diferan sponsors ki’n ed Sandra fer sa spektak in osi permet sa donasyon.
Sa i Steve Kambatta, Willow Ventures, Cable & Wireless, Moonshine ek Konsey Nasyonal pour Lar (Nac).
Letan i ti aksepte sa pti donasyon, tyermenn CCA Levek French Chang-Him ti dir ki i tre touse par sa zes akoz i fer premye fwa ki en endividi, sirtou en artis, i kontribye anver lakoz CCA.
Patel Esparon ki papa Sandra e osi son manedyer, in lo son kote dir ki Sandra in resevwar bokou avek lasosyete e ki i donk normal pour li rann en pe sa ki i’n gannyen.
Dan lepase, Sandra in osi fer lezot donasyon saritab parey anver Zwe de Zil 2011, Lasosiasyon Otizm, bann viktim linondasyon dan Les Mahé an 2013, de fanmiy Rock Lane ki zot lakaz ti brile, artis Patrick Octave ki ti malad, e bann orfelen Foyer de Nazareth ek Foyer de La Providence.
Source : Seychelles NATION