En 60enn zanfan pe pran par dan en seri aktivite ki ti konmanse yer e ki pou ale pour trwa zour.
Parmi sa 60 zanfan, apepre 40 i manm Klib Leritaz e zot aze ant 5 a 17-an.
Pour konmans lazournen yer Madanm Egla Rose ti fer en refleksyon lo savwar viv anba tenm ‘kourtwazi’.
En group manm ti al vizit Jardin du Roi e en lot group ti al La Plaine St André e vizit Lenstiti Kreol.
Swivan zot vizit zot ti partisip dan en kolaz kot Lakaz Rosa sitye kot Domaine de Val de Près, Au Cape apre ti annan dyalog, rakontaz zistwar e kont Seselwa par bann twrazyenm-az.
Madanm Rose ti osi fer en aktivite pedagozik lo rol zepis dan nou lavi apre ki bann manm ti’n dekouver sa bann zepis kot Jardin du Roi.
Pour kontinyasyon progranm ozordi zot espekte pe al ankor lo vizit apre ki zot fer refleksyon lo tenm ‘Respe’.
Bann zanfan i ekspekte plante dan zarden otour Lakaz Rosa pour fer li pli atiran. Sa bann in anamenn sa bann plant sorti dan lakour.
Zot pou osi ganny sans fini zot kolaz e fer ankor enpe dyalog avek bann sitwayen trwazyenm-az.
Me lazournen pa pou konplet san ki bann zanfan i aprann tresaz avek fey koko ek fey lantannyen, en latelye ki pe ganny animen par Brend Valentin.
Dernyen zour ki pou klotir bann aktivite, prodwi tresaz, vizit ek zepis pou ganny montre dan en legzibisyon.
Sa lazournen pou osi konmans avek en refleksyon lo ‘Partaz’, swivi par en kozri par Norvil Ernesta ek Elvis Seraphine kot bann manm pou dekouver zistwar moutya.
Sef egzekitiv Fondasyon Leritaz Sesel (SHF) Miera Savy ti dir ki zot bi se pour fer Domaine de Val de Près vin en sant aere parey i annan La France.
«Savedir i en landrwa ouver kot ou kapab fer diferan aktivite e i vin en vilaz kiltirel kot manrmay i kapab aprann lo serten laspe nou kiltir Kreol,» i ti dir.
I ti osi remersye bann sponsor atraver zot sponsored walk ek lasosyasyon tel ki Children’s Fund e dimoun ki’n kontribye pour fer sa aktivite en sikse.
I ti dir ki zot pe planifye pour fer bann aktivite tou le wikenn apre larantre trwazyenm term.
Source : Seychelles NATION