Santer tre popiler Gerald Barbe fek lans en nouvo albonm avek tit ‘Kapitenn Loulou’.
Sa nouvo konpilasyon 11 sanson i enkli lanmizik sega, rege, moutya e plizyer ankor.
Bokou nou ava rapel ban vye sanson Gerald parmi Kapitenn Loulou, Lakaz Obor Semen, Fanm Long Seve … Lo sa nouvo konpilasyon ou pou annan sans reviv sa bann letan osi byen ki antann bann nouvo sanson ki enkli Oli Ou parmi lezot ankor.
In pran Gerald 2-an pour met sa albonm lo marse e fer son bann siporter apresye en bon lanmizik kreol ki kapab fer zot danse ziska tar dan lannwit.
“In pran mwan 2-an pour mwan nobou met sa albonm lo marse. Vi ki mon ti’n tonb malad pandan sa bann letan, mon ti bezwen reganny mon lasante. Mon’n fer mon mye pour mwan rearanz mon bann vye lanmizik e met en nouvo latous avek pour mon bann siporter,» Gerald i dir.
In pran letan pour remersye tou ban dimoum ki’n kontribye pour fer sa konpilasyon en sikse.
Sa albonm i kout 125 roupi e i avant Kot Do lo Mahé e Kot Ayun lo Praslin. Si ou aste ou kopi avek Msye Barbe limenm ou pou pey selman 100 roupi.
Source : Seychelles NATION