• 3 nouvo lorganizasyon zenn i resevwar sertifika konman manm afilye SNYC
Ti le 7 Mars 1998 ki Konsey Nasyonal Lazenes (SNYC) ti lanse ofisyelman par Minis responsab pour Zafer Lazenes sa letan Madanm Sylvette Pool e yer pour mark son 19enm lanniverser, en seremoni spesyal ti’n ganny organize dan Sant Konferans Enternasyonal.
Minis responsab pour lazenes Manmzel Idith Alexander, son sekreter prensipal Msye Fabien Palmyre, sef egzekitif sa konsey Msye Alvin Laurence, son depite Manmzel Ghislaine Belmont, manm son bord, bann travayer lazenes ti asiste sa seremoni.
Osi prezan konman envite pour temwanny sa moman ti ansyen sef egzekitif konsey Madanm Vicky Van Der Westhuizen, parmi lezot envite.
Pandan sa seremoni 3 nouvo lorganizasyon lazenes – SYAH Seychelles reprezante par son vis-chairperson Lisa Bastienne, UN Youth Seychelles reprezante par son chairperson Annarose Clarrise e Stand Up Step Up Seychelles reprezante par son chairperson Trevor Louise ti resevwar zot sertifika ki fer zot lorganizasyon en manm afilye Konsey Nasyonal Lazenes.
Sete Msye Alvin Laurence ki ti prezant reprezantan sa 3 lorganizasyon zenn zot sertifika.
Msye Laurence ti dir ki sa i en gran lakonplisman pour sa 3 lorganizasyon akoz i formaliz zot langazman avek Konsey Nasyonal Lazenes e konman bann manm afilye sa bann lorganizasyon zot kapab zouir plizyer benefis ki sa konsey i ofer bann zenn ek zot mouvman.
Msye Laurence in osi fer resorti ki i annan ankor 3 lezot lorganizasyon zenn ki ekspekte resevwar zot sertifika konman manm afilye pandan mwan Mars e sa i pou bon pour zot akoz i ava permet zot pran par e osi vote pandan prosen miting zeneral anyel konsey mwan prosen.
I ti osi fer remarke ki Konsey Nasyonal Lazenes i sel lorganizasyon dan pei ki son bord i ganny elekte par bann zenn zot menm.
Lo konmansman seremoni Manmzel Belmont ti retras enpe lakonplisman konsey depi son kreasyon ziska ozordi, 19-an plitar.
I ti fer resorti ki atraver bann lannen ki’n pase Konsey Nasyonal Lazenes in pas atraver bokou sanzman pour fer li pli efikas e osi i’n devlop e entrodwir plizyer nouvo progranm pour angaz bann zenn e devlop zot. I ti eksprim remersiman a tou bann dimoun e sirtou bann zenn zot menm ki’n travay e ki ankor pe travay pour lepanouisman bann zenn.
Bann ki ti prezan ti ganny sans vwar en video ki retras devlopman konsey, son bann diferan progranm, afilyasyon avek bann mouvman enternasyonal e osi lakonplisman bann zenn.
Ler i ti pran laparol, tyermenn bord Konsey Nasyonal Lazenes Msye Ziggy Adam ti dir ki 19-an legzistans konsey pa vedir ki avan sa ti napa travay ki ti pe ganny fer pour lepanouisman zenn me okontrer bann diferan lorganizasyon, bann zenn zot menm, sekter prive osi byen ki gouvernman in travay san ses pour fer bann zenn avanse e epanouir e i ti lo lapar bann zenn eksprim gratitid pour tou sa bann travay ki’n ganny fer.
Msye Adam ti a son tour retras enpe travay konsey. I ti fer resorti ki ti an Me 2015, 17-an apre son legzistans, ki apre son eleksyon nouvo bord konsey ki li i pe dirize, ti konman enn son bann proze deside pour rearanz fason ki konsey i ganny bann manm afilye.
“Nou ti vwar li zis ki bann regroupman zenn ki ti la e bann ki ti pe devlope zot vin bann manm afilye avek konsey pour zot zouir bann benefis ki konsey i ofer,” Msye Adam ti dir.
I ti eksplike ki sa ti vin posib apre ki tou bann prosedir ek guidelines ki diriz sa konsey ti’n byen defini e etabli dan en fason kler.
“Ozordi tou zenn ek mouvman lazenes ki anvi vin en manm afilye Konsey Nasyonal Lazenes zot kapab ganny akse avek sa dokiman ki eksplik fason pour zot fer sa,” Msye Adam ti dir.
I ti osi azoute ki demars pe fer pour pibliy sa dokiman e anmenn li alaporte plis zenn.
Msye Adam in fer rapel tou bann zenn ki sa konsey i la pour zot tou, ki swa zot dan en lorganizasyon zenn ou non me i’n ankouraz tou zenn pour zwenn en mouvman lazenes ki zot kontan.
“I enportan ki bann zenn i zwenn en lorganizasyon oubyen mouvman lazenes akoz sa i permet zot pli byen devlop zot talan ek abilite,” Msye Adam ti eksplike.
I ti dir ki lo son kote Konsey Nasyonal Lazenes li i ankouraz otan lorganizasyon zenn pour vin manm e ofer plizyer servis ek benefis pour ki zenn dan sa bann mouvman pa perdi bann bon keksoz, lankadreman ki zot in gannyen, zot talan e osi bann bon valer ki pou permet zot byen entegre dan sosyete.
Source : Seyxchelles NATION