En gran lafoul krwayan larelizyon Katolik Romen ti ransanble dan Katedral Imakile Konsepsyon yer midi pour en lanmes ‘Mercredi des Cendres’ selebre par pret dyosez Victoria, Per David Alcindor.
Per Alcindor ti demann bann fidel pour konmans zot lamars ver Pak, ver larezireksyon Zezi ansanm, an fanmiy e konman en pep.
I ti rapel ban fidel si zot pe selebre karenm savedir ki Bondye i vin touzour anver nou e ki i pa zanmen kit nou. E ki ler nou lavi pe al ase byen nou devre dir mersi Bondye.
I ti osi enplor bann ki leker in vin dir parey granit (dan son prop mo) pour tourn zot leker an laser, en leker ki resevwar lezot.
Dan larelizyon Katolik ‘Mercredi des Cendres’ i reprezant premye zour karenm, en peryod 40 zour ki termin par la pasyon e larezireksyon Zezi Kri zour Pak. Sa zour bann pret larelizyon Katolik i tras en siny lakrwa lo fron sak fidel an dizan ‘konverti ou e krwar dan Levanzil’.
Karenm i osi en fason konkret pour bann katolik ini avek Zezi Kri, ki limenm pa ti manze pour karant zour dan dezer pour prepar son misyon – lanmor ek larezireksyon. I osi en lokazyon pour bann fidel apros pli pre avek Bondye.
Sa lannen en keksoz spesyal avek sa lanmes yer se ki i ti osi en lokazyon pour promouvwar latitid zero tolerans diskriminasyon kont bann dimoun ki’n afekte avek viris HIV oubyen maladi SIDA.
Dan son lapres Per Alcindor ti enplor tou dimoun pour sanz sa move regar akizan ki nou zet lo bann ki’n ganny afekte.
Bokou plakar avek desen papiyon an kouler avek mesaz ‘Zero Diskriminasyon’, ti’n kole partou lo miray dan katedral.
Reprezantan diferan lorganizasyon ki pe ed sa bann dimoun afekte tel ki HASO, ti osi prezan.
Bann staff STC prezan ti osi ganny mansyon spesyal alokazyon lanniverser 9an legzistans zot lakonpannyen. Zot ti menm ganny envite pour lir lektir.
“I enportan pour nou kretyen rasanble pour konmans sa karenm. I osi en moman pour nou restitye nou relasyon avek Bondye. ‘Mercredi des Cendres’ i en moman kot nou konmans nou lamars ver larezireksyon Zezi Kri, zour Pak. I enportan akoz Bondye i apel nou, i donn nou en leker e en lespri nouvo. I fer nou vin en nouvo dimoun. Alor peryod karenm i en rekonmansman,” Per Alcindor ti dir.
I ti osi envit bann kretyen pour fer penitans.
“Pran sa semen pour nou kontinyen swiv Zezi, pour nou osi ariv ver larezireksyon,” i ti dir.
Konsernan bann dimoun afekte avek labi sibstans ek viris HIV ouswa maladi SIDA, Per Alcindor ti enplor bann krwayan ki zot pa devret fer okenn diskriminasyon kont sa bann dimoun akoz zot pa la pour ziz personn. O kontrer, I ti dir, zot devre ed sa bann dimoun pour releve.
I ti mansyonn serten kalite regar ki serten antre nou i annan lo lezot ki’n tonbe.
“Nou regar i kapab dir en kantite keksoz menm si nou pa koze. Dan sa letan karenm annou annan en sanzman dan nou regar ver nou ser, frer ki’n tonbe,” Per Alcindor ti dir.
Source : Seychelles NATION