Konpetisyon ‘Sesel Enspir Mwan’, ki en konpetisyon organize par Konsey Nasyonal Lazenes (SNYC) e ki donn bann zenn aze 15 a 30-an sans pour promouvwar zot talan artisitik dan diferean form lar parey lapentir, zistwar kourt, poenm ek sanson, ti ofisyelman lanse tar semenn pase avek en spektak mizikal dan oditoryonm Anse Royale.
Lansman pour sa enn konpetisyon in fer pli boner ki labitid pour donn artis plis letan pour prepar zot.
Lot sanzman sa lannen se ki pou annan 2 kategori laz olye trwa. E sa se 15-an a 21-an e 22-an a 30-an. Avan bann kategori ti 15 a 17-an; 18 a 24-an e 25 a 30-an. Pour lans sa konpetisyon sa lannen, plizyer partisipan ki ti ladan lannen pase ti anim sa sware.
Sef egzekitif SNYC, Alvin Laurence, i eksplike akoz sa bann sanzman:
“Sa lannen nou’n deside pour lans konpetisyon ‘Sesel Enspir Mwan’ bokou pli boner ki labitid akoz bann artis zot menm zot trouv zot avek sa konstrent letan, parey nou ti trouve lannen pase letan nou ti pe fer Festival Lazenes an Desanm. E sa lannen nou le fer ki tou travay in fini rantre aparti le 30 Zen pour ki i donn bann ziri ase letan travay lo la e finaliz li pour ki ler Festival Lazenes i arive tou bann travay i a la pour nou montre piblik,” i ti dir.
Msye Laurence ti dir ki sa a osi permet bann zenn ganny zot pri pandan sa festival. I ti fer kler ki sa konpetisyon i baze lo Sesel e ki tou proze i devret orizinal.
M.J.
Source : Seychelles NATION