![111]()
‘Annou kontinyen promouvwar e prezerv nou lalang maternel’
Minis pour Lazenes, Spor ek Kiltir Idith Alexander in demann tou Seselwa pour kontinyen promouvwar e prezerv nou lalang maternel.
Minis Alexander in dir sa dan son mesaz alokazyon Lazournen Enternasyonnal Lalang Maternel ki tonm ozordi.
Teks entegral Minis Alexander i lir koumsa :
« Ozordi le 21 Fevriye 2017 nou pe selebre 17enm Lazournen Enternasyonnal Lalang Maternel baze lo tenm adopte par UNESCO ‘Ver en lavenir dirab atraver ledikasyon miltileng’. Pour ki sa tenm i kapab vin en realite, fodre ki tou dimoun i ganny akse avek son lalang maternel.
« Lalang maternel i annan en lenpakt tre pwisan dan devlopman en endividi, i fasonn son panse, santiman, lemosyon e sa ki pli entim pour li. Son valer i plis ki en drwa kiltirel, i en souvenir son lanfans oubyen en nostalzi lepase.
« Sa zour le 21 Fevriye in ganny swazir pour rann omaz en group etidyan sorti Bangladesh ki an 1952 ti manifeste an Pakistan pour ki zot lalang maternel i ganny deklare konman dezyenm lalang nasyonal.
« Nou isi Sesel, nou sanse pour annan trwa lalang nasyonal. Nou annan tou rezon pour selebre sa diversite kiltirel ek larises lengwistik avek fyerte.
Sa lazournen i donn nou sa loportinite pour promot davantaz nou diversite lengwistik, ledikasyon miltileng e osi sansibiliz nou tradisyon kiltirel fonde lo konpreansyon, latolerans ek dyalog. En kiltir lape i kapab ganny konstrir dan en lespas kot tou dimoun i annan drwa servi son lalang maternel plennman, libreman e dan diferan sirkonstans lavi.
« Sesel, nou lalang maternel i ganny proklanmen konman enn nou drwa fondamantal e konstitisyonnel. Drwa a nou lalang maternel i vedir drwa pour nou ganny akse, drwa pour nou aprann oubyen etidye e drwa pour nou servi nou lalang Kreol, dan nou fonksyonnman lavi toulezour e dan tou sitiasyon lavi.
« Mon swete ki nou tou konman seselwa nou kontinyen promouvwar e prezerv nou lalang maternel.
« Bonn fet lazournen lalang maternel. »