Plizyer zenn aze ant 15 e 35-an ki’n pran par dan edisyon 2016 konpetisyon ‘Sesel Enspir Mwan’ ti resevwar zot pri dan en seremoni Vandredi swar dan Sant Konferans Enternasyonal.
Sa konpetisyon, ki organize par Konsey Nasyonal Lazenes (SNYC), ti lanse an Oktob e sa lannen i son 4enm edisyon.
Prezantasyon pri Vandredi swar ti koensid avek louvertir Festival Lazenes.
Atraver sa konpetisyon bann zenn zot kapab montre ki mannyer Sesel i enspir zot atraver plizyer form lar tel parey lapoezi, lapentir, zistwar ek sanson.Bann gannyan in resevwar pri ki varye depi 1,500 ziska 12,000 roupi e sa ki’n fer pli byen pou osi benefisye avek voyaz artistik aletranze letan i posib.
Ler i ti adres bann zenn kot sa seremoni, Minis pour Lazenes, Spor ek Kiltir Manmzel Idith Alexander ti salye e felisit bann ki pe kontribye dan en fason pozitiv dan sosyete.
Pour bann ki’n les Sesel enspir zot Minis Alexander i dir ki ankor sa lannen zot in briye e fer Sesel fyer lo lasenn nasyonal, rezyonal e enternasyonal swa atraver zot bann talan sportiv, artistik ou entelektyel.
“Mon remersye tou zenn fiy ek zenn garson ki pe deza fer tou pour ki nou pei i avans pli devan. Zot in vin ansanm pour rod solisyon kot zot in vwar i annan serten difikilte. Zot abilite konman zenn pour vwar keksoz atraver nouvo dimansyon i enportan pour enspir nouvo lide ek solisyon. Mon osi salye zenn ki dan en fason pli trankil pe fer zot kontribisyon pozitiv dan nou sosyete,” Minis Alexander ti dir.
“I annan bokou zot ki pa dan lizye piblik me ki pe fer keksoz ekstraordiner dan kominote e mon ankouraz zot pour kontinyen dan sa semen pozitiv,” Minis Alexander ti dir.
Dan tou form lar dan sak konpetisyon ti annan 3 kategori: 15 a 17-an, 18 a 24-an, 25 a 30-an respektivman.
Bann gannyan 1er, 2enm e 3enm pri dan sak kategori i swivan dan lord respektiv.
Pour lapoezi:
(Kategori 15 a 17-an) Shania Andimignon, Selly Robert e Chamilie Payet; (Kategori 18 a 24-an) Raphaella Dugasse, Erena Dugasse e Siobhan Rachel;
(Kategori 25 a 30-an) Ayiel Bonne, Henrico Ernesta e Vanessa Marie.
Pour zistwar kourt:
(Kategori 15 a 17-an) Nicky Jean, Ronny Volcy e Stanibelle Azemia;
(Kategori 18 a 24-an) Naomi Nibourette, Siobhan Rachel, Valentina Marie;
(Kategori 25 a 30-an) Venesia Labrosse, Nathalie Brutus e Raphaella Padayachy.
Pour lapentir:
(Kategori 15 a 17-an) Selly Robert, Christelle Cecile;
(Kategori 18 a 24-an) Julia Hoareau, Mona Dodin e Dino Dodin;
(Kategori 25 a 30-an) Doris Nourrice, Jeff Lesperance e Raphaella Padayachy.
Pour sanson:
(Kategori 15 a 17-an) Kelly Mathiot, duo Michelle Pool ek Angelo Adrienne, e duo Dianya Athanase ek Ingrid Victor;
(Kategori 18 a 24-an) Marthina Labrosse, Mary Moncherry e Alisha Ernesta;
(Kategori 25 a 30-an) Christiana Alexis, Davis Finesse e Savio Raguin.
Sa seremoni ti enn ranpli avek animasyon sanson ek poenm ki ti’n ranport pri dan sa konpetisyon osi byen ki sanson ek ladans koreografik par latroup lazenes.
Source : Seychelles NATION