Travay bann zenn artis kreolofonn ki ti pran par dan en konpetisyon pe ganny ekspoze dan en legzibisyon ki ti ouver yer dan kad bann aktivite pour mark 31enm Festival Kreol.
Sa konpetisyon ti ouver pour tou zenn dan bann pei kreolofonn aze depi 4-an ziska 21-an avek bi devlop zot kreativite e ofer zot posibilite pour pran konsyans zot valer atraver lar.
Sa lannen, parey bann lannen presedan, in annan bokou travay ki bann envite ti kapab vwar dan sa legzibisyon.
Sete tyermenn bord Konsey Nasyonal pour Lar (Nac), Gabriel Essack, ki ti ofisyelman ouver sa legzibisyon dan prezans Minis pour Tourizm ek Kiltir Alain St Ange, sef egzekitif Nac Jimmy Savy e sekreter prensipal pour kiltir Benjamine Rose.
Osi prezan ti bann zofisye gouvernman, bann sponsors, parmi lezot envite.
Apre louvertir lekspozisyon bann tablo, bann zenn artis ti resevwar zot pri.
Dan kategori 4 a 7-an, Amy Valentin ki sorti lekol Takamaka ti ranport premye pri, swivi dan dezyenm plas par Malik Quilindo sorti lekol Anse Etoile. Trwazyenm pri ti ranporte par Rahil Barbe sorti lekol Cascade.
Venker kategori 8 a 13-an ti Shamilla Marie sorti lekol Beau Vallon e dezyenm pri ti ranporte par Alisa Pierre sorti lekol Beau Vallon. Rehnane Marie-Jeanne sorti lekol Anse Etoile ti ranport trwazyenm pri.
Pour bann zenn artis dan kategori 14 a 17-an, se Sarah Larue sorti lekol Lenstiti pour Lar ki ti sorti venker swivi dan dezyenm plas par Erika Niole sorti lekol Plaisance segonder. Etidyan lekol Lenstiti pour Lar, Egbert Hoareau, ti ranport trwazyenm pri.
Dan dernyen kategori ki ti pour bann artis 18 a 21-an, venker ti Emma Shirima swivi par Ashley Esparon ek Elka Belle dan dezyenm ek trwazyenm pozisyon respektivman. Tou le trwa zot sorti lekol Lenstiti pour Lar.
Source : Seychelles NATION