Manm piblik pe ganny demande pour zwenn ansanm pour fer sa 31enm Festival Kreol en sikse.
Sa lapel ti lanse pandan en konferans de pres ki departman kiltir ti organize yer.
Prezan pandan sa konferans, ki ti deroul kot restoran Dolce Vita anvil, ti Minis pour Tourizm ek Kiltir Alain St Ange, sekreter prensipal pour kiltir Benjamine Rose, sef egzekitif Konsey Nasyonal pour Lar (Nac) Jimmy Savy ek bann sponsors.
Minis St Ange ti koz lo bann pwen for sa enn festival e i ti anonse ki louvertir ofisyel pou fer le 28 Oktob.
“Nou’n swazir le 28 Oktob akoz i tonb zour ki Nasyon Zini (UN) in deklare konman Lazournen Enternasyonal Kreol e sa swar nou pou annan nou seremoni dan Stad Popiler, Victoria,” i ti dir.
Pou osi annan bann group ek delegasyon sorti aletranze ki pou pran par dan seremoni louvertir, osi byen ki bann digniter tel ki Prezidan Konsey Rezyonnal Didier Robert avek son delegasyon.
“Sa pou montre ki ansanm nou kapab tenir e met alavan sa ki bann zil Losean Endyen i war zot atase avek e sa se kreolite ek kiltir kreol dan son plen,” Minis St Ange ti dir.
Minis ti osi koz lo bann nouvote osi byen ki bann levennman ki’n ganny re-entrodwir dapre sa ki lepep in demande.
Sa i enkli ‘Selebo’ Bal Lapousyer dan Viktorya demen, ‘Tifin’ Maryaz Tradisyonnel ki pe fer Beau Vallon Sanmdi , ‘Kouzen Reunionnais’, Dimans Kreol Borlanmer ki pou fer Anse Royale e osi klotir festival atraver Bal Asosye kot Lenstiti Kreol le 31 Oktob.
Minis ti osi annan en mesaz pour tou Seselwa lo sa levennmen ki anmenn inifikasyon ek lape.
“I sa sel lafet ki tou Seselwa – imateryel son krwayans lo kote li i panse in sorti plis ki en lot – sa enn i pour nou tou e se sa enn lafet, sirtou le 28 si tou Seselwa i kapab war zot dan Stad Popiler ansanm pour war son defile ek seremoni louvertir e partisipasyon bann group Seselwa ek bann group sorti dan bann zil dan la rezyon,” i ti dir.
In envit tou Seselwa pour desann pour fer sa enn festival en sikse e partisip an solidarite.
Minis ti osi remersye bann sponsors prensipal ki Airtel, Barclays ek Air Seychelles pour zot sipor e osi bann lezot partener ek endividi.
PS Rose ti dir ki antou i annan 34 aktivite ki varye e vize ver zanfan, en pe pli akademik, vize ver dimoun aze e bann spektak mizikal ki gratwit.
Parmi sa 34 aktivite ladan zis 7 ki peye.
“Sa i montre ki nou pe viz bann aktivite pour popilasyon an zeneral pour zot kapab vin nenport aktivite ki zot santi zot konfortab ladan, e nou bezwen zot sipor pour zot desann akoz san en lodyans menm si nou fer en progranm sa aktivite pa pou en sikse,” i ti dir.
Progranm i kapab ganny trouve kot Bibliotek Nasyonal, lofis Bord Tourizm (STB), Nac, dan zournal Seychelles NATION e osi dan progranm ‘Bonzour Sesel’ i annan plizyer organizater ki al koz lo zot bann aktivite.
PS Rose ti dir i manda gouvernman pour siport Festival Kreol akoz i en levennman atraver lekel nou manifeste nou kiltir.
“Pour sa lannen gouvernman in met en sonm apepre R2 million dan Festival Kreol akoz nonm aktivite ki nou annan e bann sekter prive in ed en kantite avek bann aktivite. I osi enportan pour note ki dan Festival Kreol i annan dimoun ki priveman antre pour kontribye e i annan levennman ki ganny organize priveman,” i ti dir.
Sa lannen i annan plis sponsors ki bann lannen avan e provizyon pe osi ganny fer avek SPTC pour met plis bis lo larout pandan sa semenn ki vini.
Msye Savy ti dir ki apre louvertir ofisyel parey tou le lannen nou pou annan en spektak rezyonnal.
“Pou annan en group Seselwa, en lekip sorti Lareinyon apele Tine Poppy, en latroup kiltirel ‘Latroup Grodin’ sorti Rodrig ek en group segatye Morisyen Denis Gaspar ek son group,” i ti dir.
Parkont sa lannen pou napa konpetisyon sanson.
Bann reprezantan Airtel, Air Seychelles ek Barclays ti asir zot korperasyon ek sipor dan 31enm Festival Kreol.
Reprezantan Airtel, Erna Hoareau ek Eusha Auguste, ti prezant Minis St Ange avek en tyek lavaler R50,000.
Air Seychelles pe ede atraver tiket gratwit pour bann dimoun medya ek lapres ki pe vini sorti dan bann pei aletranze e osi aksesibilite transportasyon domestik pour bann zabitan Praslin.
Barclays pe osi ede promouvwar nou laspe kiltirel pandan sa Festival Kreol.
Source : Seychelles NATION