Plizyer proze devlopman pe ganny propoze pour distrik Mont Buxton e yer en delegasyon o nivo ti fer en vizit dan bann diferan landrwa kot sa bann proze i ekspekte ganny fer.
Sa vizit i swiv diskisyon ki lotorite distrik Mont Buxton in gannyen avek Minister Litilizasyon Later ek Lakaz pour kapab pli byen anmenn devlopman dan sa distrik.
Manm sa delegasyon ki ti fer sa vizit yer ti enkli Minis pour Litilizasyon Later ek Lakaz (MLUH) Christian Lionnet, Minis pour Zafer Sosyal, Devlopman Kominoter ek Spor Vincent Meriton, sekreter prensipal pour MLUH Joseph Francois, sekreter prensipal pour polisi ek lenplimantasyon Yves Choppy, sef egzekitif Property Management Company (PMC) Jules Baker, parmi lezot zofisye ek lotorite distrik.
Vizit ti pe regard progre devlopman blok flat kot Ex-Dominic Savio, redevlopman lo teren Lari Hangard ek akse semen pour bann rezidan dan sa kanton, Ex-Bibianne Ah-Kong Estate kot lotorite pe get dan posibilite fer ekstansyon pour azout nouvo blok flat lo sa compound.
En vizit ti osi ganny fer dan sou-distrik Mont Signal (obor kort) kot kat morso later dan land bank, swivi par en lot dan leo Mont Signal pour vizit set morso later kot gouvernman i ankor pe diskit e negosye lo devlopman sa later.
En lot sit ti osi ganny regarde pour get dan posibilite en proze konndominyonm dan lefitir.
Vizit ti kontiny Dan Lenn pour get proze redevlopman e diskit lavant later e osi diskisyon redevlopman potansyel kot MC/Dr Ramados, Lari Hangard.
Minis Meriton ti dir ki sa bann teren i difisil pour fer devlopman lola e laplipar sa bann teren i popriyete prive.
“In annan diskisyon ek negosiasyon ki pe pran plas avek bann popriyeter prive avek bi pour kapab fer en lesanz oubyen aste sa bann later pour ki nou kapab redevlop sa bann landrwa pour permet bann fanmir ki’n fer zot aplikasyon zot osi zouir sa polisi ki sak fanmir Seselwa i annan en twa lo zot latet,” i ti dir.
Formil ki’n ganny adopte pour enplimant bann proze se regard dansite sa landrwa, bezwen devlopman e osi dimoun ki deza annan serten langazman lo sa bann morso later spesifik.
“Nou pou annan bann proze konndominyonm, social housing e osi proze endividyel kot gouvernman pou kapab aste sa propriyete prive e apre batir pour enn ou de fanmir kapab repeye. Lobzektif prensipal se pour fasilit redevlopman bann sou distrik Mont Buxton ki malerezman pour en bon pe letan in soudevlope,” i ti azoute.
I ti fer resorti ki gouvernman i annan tou lentansyon pour enplimant bann proze ki’n planifye depi lannen 2016 ziska 2021.
“Nou pou fer li par bann diferan faz depandan lo priyorite e ki pli vit nou kapab ganny bann laranzman teknik, par egzanp way leave ek bann plan,” i ti dir.
Minis ti osi eksprim son lapresiasyon proge sa devlopman kot Ex-Dominic Savio ki son premye pyer ti ganny depoze an Oktob lannen pase e premye blok flat i ekspekte fini ver Desanm.
Lo problenm desarz ki bokou bann blok flat pe fer fas avek, Minis Meriton ti dir ki Korporasyon Litilite Piblik (PUC) in enformen ki i deza annan en letid ki’n konmanse pour rod bann nivo, design sa sistenm desarz e rod resours finansyel pour kapab konekte avek sistenm santral.
Bann portre ki akonpanny lartik i montre vizit delegasyon kot sit bann diferan proze ki pe ganny propoze.
Source : Seychelles NATION