Anba gidans Martin Aglaé, Linyon Sanzman ti yer apremidi ofisyelman nonm son bann kandida pour prosen eleksyon Lasanble Nasyonal.
Sa ti pandan konvansyon ki sa parti ti organize dan lasanm nimero 1 kot Sant Konferans Enternasyonal Sesel.
Tenm swazir par sa parti pour sa konvansyon e pour kanpanny avan eleksyon i ‘Ini pour en nouvo Lasanble’.
Bann kandida pour sa 25 distrik i konm swivan: Louisa Ernesta (Anse aux Pins), Tershia Songoire (Anse Boileau), Dave Jeanne (Anse Etoile), Christopher Savy (Anse Royale), Isha Moustache (Au Cap), Pascal Balthilde (Baie Lazare), Jimmy Gabriel (Baie Ste Anne), Maressa Labonte (Beau Vallon), Ruben Amade (Bel Air), Erdley Labonte (Bel Ombre), Darius Revera (Cascade), Martin Aglaé (English River), Rivaltz Hoareau (Glacis), Kevin Sinon (Grand Anse Mahé), Bryan Brizilia (Grand Anse Praslin), Jean-Baptis Rose (La Digue/Zil Pros), Sharon Moses (Les Mamelles), Nelson Rose (Mont Buxton), Sara Denousse (Mont Fleuri), Carol Dubel (Plaisance), Jean-Yves Sinon (Pointe Larue), James Port-Louis (Port Glaud), Cliff François (Roche Caïman), Rena Agricole (Saint Louis) e Vanessa Brutus (Takamaka).
Ler i ti adres son bann siporter, Msye Aglaé ti dir ki “Linyon Sanzman i en vre parti lopozisyon”.
I ti azoute ki zot sa bann zenn kandida zot pare pour travay pour Sesel akoz Seselwa i bezwen en lasanble ki travay.
“Mon bann kandida i zenn, me zot determinen pour fer fas avek sa lalit kont Parti Lepep. Nou pou travay dir pour ini Sesel, anmenn en Lasanble Nasyonal pli for e pli ini. E nou pa pou zis bann ‘Yes Men’,” Msye Aglae ti dir.
I ti azoute ki “nou lobzektif se pour anmenn en meyer servis lasante, meyer servis lapolis e lazans ki lalit kont drog dan nou pei pour nou annan en meyer Sesel”.
Eleksyon Lasanble Nasyonal pou fer le 8, 9 ek 10 Septanm sa lannen.