37 zenn pe reprezant bann diferan distrik ek bann lenstitisyon skoler dan 13enm group Lasanble Nasyonal pour Lazenes (SNYA).
Sa bann zenn ti pret serman Sanmdi bomaten kot lasal konferans STC dan prezans Vis-Prezidan Danny Faure, Speaker Lasanble Nasyonal Dokter Patrick Herminie, sef egzekitif Konsey Nasyonal pour Lazenes (SNYC) Alvin Laurence, depite sef egzekitif SNYC Ghislaine Belmont, sekreter prensipal pour Lazenes Alain Volcère, parmi lezot sekreter prensipal, manm SNYC, direkter ek direktris lekol e lezot envite distenge.
Speaker 13enm lasanble lazenes i Jellisa Julie ki pe reprezant distrik Mont Fleuri.
I ti dir ki son laspirasyon se ki pandan sa lannen zot kapab anmenn en kontribisyon valab lo bann size nasyonal.
«Mon vizyon i enn ki senp, ki konman bann zenn reprezantan nou bann distrik ek lenstitisyon skoler nou servi sa loportinite ki a nou dispozisyon e esey anmenn en diferans dan lavi bann lezot zenn lo en nivo kominoter e nasyonal. En diferans pozitiv ki zour nou manda i fini an 2017, i ankor la pe anmenn en kontribisyon ekstra e fasilit deroulman lavi bann zenn,» i ti dir.
Bann nouvo manm ti resewar badge ki pou permet zot ganny akse avek lenformasyon teknolozi dan biro servis lazenes kot SNYC.
Bann zenn parlmanter 12enm group ti ganny prezante avek en sertifika.
Speaker sortan Darrel Uranie ti fer sorti en mesaz pour tou zenn dan Sesel.
I ti dir ki nou bezwen leve debrouye pour vin sa bann adilt ek sitwayen responsab ki nou pei i bezwen e merite.
«San dout loportinite pour en zenn dan Sesel i la. Loportinite edikasyonnel, sportif, travay e bokou lezot fason. Ou anvi vin en profesyonnel, Liniversite Sesel i la pour ankadre ou. Ou anvi en lanplwa, skim ‘My first job’ i la pour fasilit sa bann ki fek sorti dan segonder ek pos-segonder. Linisyativ i lo nou bann zenn pour sezi bann loportinite. Nou pa kapab les nou linyorans vin sa baryer nou devlopman e les nou lekor tonb viktim bann fleo ki egziste,» i ti azoute.
Lo son kote Msye Laurence ti donn sa bann zenn bann mo lankourazman ki zot a reste fidel avek bann bon pratik e anmenn li lo en lot nivo.
I ti fer resorti ki 444 zenn in pas atraver sa progranm.
Premye lasanble i ekspekte fer le 30 Avril kot National House.
Pour reprezant bann distrik i annan Daryl Sicobo (Anse aux Pins), Rania Matombe (Anse Boileau), Kimberly Marie (Au Cap), Darius Joliceour (Anse Etoile), Cultina Marcel (Anse Royale), Olivia Revera (Baie Lazare), Angelo Anthanase (Baie Ste Anne), Leah Ernesta (Bel Air), Rodney Jeremie (Beau Vallon), Angela Bill (Bel Ombre), Abimaelle Onezime (clerk) (Cascade), Jerry Bibi (English River), Aline Marie (Glacis), Gretel Clarisse (Grand Anse Mahé), Ivan Vidot – depite speaker – (Grand Anse Praslin), Marie-Stella Freminot (Perseverance 1), Neil Sirame (Perseverance 2), Dorah Radegonde (La Digue), Raina Nicette (Les Mamelles), Sylvie Pothin (Mont Buxton), Angelique Aglae (Plaisance), Emminielle Elisabeth (Pointe Larue), Anil Ladouce (Port Glaud), Audrey Tirant (Roche Caïman), Neddy Jean (St Louis) ek Julie Confiance (Takamaka).
Pour bann lekol segonder i annan Shana Mathiot (Plaisance), Joan Laurette (Mont Fleuri), Julio Charles (Pointe Larue), Tania Arissol (La Digue), Ravy Mathiot (Praslin), ek Larissa Boniface (Anse Royale).
Reprezantan bann lenstitisyon pos-segonder i Danio Vidot (Lakademi Tourizm Sesel – STA), Jean Michel Camille (Lekol pour Letid Avanse – Sals), Sebastien Cowin (Lekol pour Maritim – MTC), ek Marcus Hoareau – depite clerk (Lenstiti pour Teknolozi – Sit).
Source : Seychelles NATION