Bann dimoun avek dezabilite ti egey lodyans atraver en ‘talent show’ tre spektakiler Sanmdi dan Sant Konferans Enternasyonal (ICCS).
Sa spektak, ki ti deroul anba tenm ‘Nou Dezabilite I Nou Abilite’, ti atir en gran lafoul.
I ti organize par Konsey Nasyonal pour dimoun avek Dezabilite (NCFD) e preski antyerman sponsor par lakonpannyen Pillay R Group dan kad zot progranm Corporate Social Responsibility (CSR). I en levennman ki fer tou le dezan.
Prezan dan lasal ti osi Vincent Meriton, Minis pour Zafer Sosyal, Devlopman Kominoter ek Spor; Alain St Ange, Minis pour Tourizm ek Kiltir; Jean-Paul Adam, Minis pour Finans, Komers ek Lekonomi Ble; Idith Alexander, 
Minis pour Travay e Devlopman Resours Imen; Sarah Rene, Patronn pour bann dezabilite; Ramu Pillay, Patron Pillay R Group ek lezot envite distenge, paran, fanmiy ek zanmi bann dezabilite.
Pandan lasware bann dezabilite ti sante e resit bokou poenm patriotik baze prensipalman lo tenm nasyonal ‘Mon Kontan Sesel’.
Me ti osi annan sanson byen popiler isi Sesel konpoze par artis enternasyonal me sante par bann dezabilite sa zour.
Sa spektak in met ansenn antyerman par bann dezabilite zot menm.
Ladans tradisyonnel tel ki sega, moutya, tinge ti osi sof lasal.
“En keksoz ki toultan mon’n dir se ki dezabilite i pran labar zot menm,” Madanm Rene ti dir dan de pti mo pour lans spektak.
I ti osi azoute ki bann dimoun avek dezabilite i devret annan en lasosyasyon pour fer lotorite konnen ki zot bezwen e met a zot dispozisyon tou bann fasilite pour devlop zot potansyel.
Madanm Rene ti osi resevwar en bouke fler avek bann dezabilite konman en zes lapresiasyon pour sa ki i’n fer pour zot.
Lo son kote, Msye Pillay ti dir ki Pillay R Group, atraver son responsabilite sosyal, i touzour rod fason pour fer keksoz pour bann dezabilite.
I ti osi nonm lezot levennman ki sa group i organize pour dezabilite tel ki parti Nwel tou le lannen. Msye Pillay ti azoute ki i’n propoz avek minister en pri R10,000 tou le lannen pour en dimoun avek dezabilite ki annan talan.
Minis Meriton a son tour ti dir ki tou pe ‘strive’ pour fer keksoz pli byen pour bann dezabilite. I ti osi remersye tou sa ki pe travay dan distrik pour donn abilite bann dezabilite.
“Mon ti a kontan dir mersi. Mersi tou bann group ki pe travay dan distrik pour donn abilite, pou montre abilite nou bann dezabilite e met zot a lavan,” Minis Meriton ti dir.
I ti osi anonse ki Sesel in kree en partenarya avek ‘Autisme Reunion’ pour kapab ‘tir abilite dan otizm’. E ki pei pe osi war ek sa ki konsernen pour annan bann bis avek fasilite pour dezabilite.
Lasware ti terminen ek sa sanson zot tenm ‘Nou Dezabilite se Nou Abilite’.
Nou prezant zot serten moman for sa spektak atraver nou seri portre tire par nou fotografer Patrick Joubert.
Source : Seychelles NATION