Malgre son laz Msye Raphael Labiche ki ti konmans plante byen zenn avek son paran, i ziska ozordi ankor tre aktiv lo son laferm Barbarons.
Apre ki i ti kit lekol dan 6enm, Msye Labiche in fer diferan travay tel parey painter ek peser. Apre sa in fer 27-an dan larme e pran son retret ler i ti en serzan mazor.
Lespas ki Msye Labiche i annan pour kiltive i apepre 10,000 met kare. I travay avek son garson ek 2 travayer etranze.
Son swe se pour devlop tou sa later kot i pe plante e pour li kapab arive fer sa i dir i pou bezwen ankor 2 travayer oubyen mekaniz enpe plis serten aktivite laferm tel parey preparasyon later, plante, aplikasyon serten langre e osi pour aroze.
Pandan en pti vizit lo son laferm, Msye Labiche ti eksplike ki i pli kontan servi fimyen ek lezot metod natirel pour kontrol pes ek maladi lo son laferm.
“Sa i pli bon akoz i ede anpes bann prodwi pouri vitman e zot reste fre pour plis letan apre rekolt e mon kapab vann zot en pti pe pli ser,” i ti dir.
Me si anka i bezwen servi pestisid oubyen langre, i pli kontan servi bann pestisid biolozik tel parey Laser, Rapid raiser, parmi lezot.
“Mon kontan fer bann pti resers e bokou lobzervasyon pour ed mwan kapab ganny maksimonm rekolt dan sa ki mon plante,” Msye Labiche ti dir.
Msye Labiche i plant tou kalite legim lo son laferm e sa i enkli lalo, mai, kokonm, brenzel, piman, zariko… I osi plant en varyete gro manze parey mayok, patat ek fri parey bannann ek papay.
Ziska prezan pli gran problenm lo son laferm se dezas natirel e souvan son laferm i ganny bann gro divan ki afekte son plantasyon. En lot problenm se ki parfwa i trouv li difisil pour arive vann tou son bann prodwi.
Menm si in ariv laz retret, Msye Labiche i touzour kontan plante.
“Ar sa mon kontan bokou e mon vwar mwan pe kontinyen ziska ler mon pou nepli kapab,” i ti dir.
Msye Labiche i dir i krwar plante i dan son disan. Fodre dir ki parmi son 3 frer ek 3 ser i annan ki osi pratik lagrikiltir — Madanm Andrine Denis ki reste Baie Ste Anne Praslin ek Msye Theophane Denis ki reste Takamaka zot osi fer lagrikiltir.
En konsey ki i oule donn bann zenn ki enterese pour pran lagrikiltir konman en karyer i: “Fodre zot serye akoz i en travay dir e demann bokou determinasyon, perseverans ek lanvi pour reisir.”
Dan son letan lib Msye Labiche i kontan plante menm me i osi kontan regard bann film, televizyon e ekout lanmizik.
Source : Seychelles NATION