Demen, Vandredi le 1er Avril zafer pou sal, tanbour moutya pou sofe, lasaler sa dife pou monte pour met nou dan lanbyans sa sware moutya ki pe 
ganny organize kot Cable & Wireless Arena par M.V Light and Sound Entertainment.
Tou pou deroul apartir 7er diswar kot dife pou ganny alimen pour nou konmans sofe e danse ziska granmaten.
Diferan santer pou prezan pour met nou dan sa laganm moutya. Parmi pou annan Sandra, Joennise, Joseph sinon, Norville Ernesta, Mervin Camille, François Larue, Jany ek group Leve Tradisyon.
Byensir ou deza pe demann ou lekor kote ou kapab ganny ou tiket pour sa sware moutya ? Pa trakase tiket i anvant pour selman 100 roupi kot Deba Store, Konsey Nasyonal pour Lar ek Kot Do. Tiket pou osi ganny vann zour sa sware moutya. Ou kapab osi kontakte Joennise Juliette lo nimero telefonn 2722277 pour ganny en stall.
Ou tiket pou ganny mete dan en raffle kot ou kapab ranport en tiket avyon lo Mihin Lanka pour nenport destinasyon.
Alors konman ou fini travay demen, al lakaz, apre desann dan sa sware moutya kot Cable & Wireless Arena. Vini nou a sote, nou a kriye, nou a fer flanbe sa dife ziska bomaten.
Oli problenm si nou anvi sant Loula, Gran blan Msye Bourzwa, Madanm Jean-François?
Pou osi annan lasoup anvant.
Sa sware moutya pa ti pou posib san led Takamaka Bay, Cable & Wireless ek Konsey Nasyonal pour Lar.
Nou a rapel ki menm si nou pe zwe moutya Vandredi swar, lalwa ki anpes bat moutya apre 6er diswar pa ankor aboli menm si zournal Seychelles NATION in souvan fer rapel ki sa lalwa kolonyal i merit ganny aboli.
U. J.
Source : Seychelles NATION