Bann prizonnyen Montagne Posée i aprezan kapab benefisye avek en servis danter ki a zot dispozisyon sirplas.
Sa fasilite ki baze dan blok zonm, ti ofisyelman ouver semenn pase par Sirentandan prizon Maxime Tirant, dan prezans bann zofisye Minister Lasante ek Servis Prizon.
Msye Tirant ti dir ki sa proze in reisi finalize avek bon korperasyon Minister Lasante ek bann lezot partener.
«Sa i en keksoz ki nou ti anvizaze fer en bon pe lannen pase e dan sa demars nou’n ganny kado serten lekipman avek UNODC (Lorganisyon Nasyon Zini pour Drog ek Krim). Me nou’n ganny enpe retar pour trouv en landrwa apropriye pour nou fer sa klinik akoz landrwa i enpe kwense,» i ti dir.
I ti eksplike ki parmi bann rezon prensipal ki sa servis in ganny etabli i pour reanbelir servis swen lasante dan prizon e osi reponn a gran demann pour servis danter dan prizon.
«Nou’n konstate ki nou annan en gro problenm danter dan prizon e vi ki en kantite dimoun pe antre dan prizon avek sa problenm ledan pa bon, e bann ka i akimile nou pa ti pe ganny sifizaman slot atraver bann klinik kominoter par egzanp Anse Boileau, Baie Lazare, Anse Aux Pins, Anse Royale,» i ti dir.
I ti azoute ki sa fasilite pou ede redwir lakantite prizonyen ki sorti pour al rod swen, sitisayon ki ti pe met en presyon lo resours tel ki transportasyon ek bann travayer ki bezwen eskort zot.
Sa klinik pou osi kapab akey plis pasyan prizonnyen ki bann klinik kominoter, me pwen pli pertinen se sa kestyon sekirite kot i annan risk ki prizonnyen i kapab sove ouswa fer lezot keksoz negativ ou ilegal. Klinik pe swete vwar dis pasyan dan en zour pour redwir backlog e fer fas avek bann nouvo ka.
«Dan lavenir nou menm kapab azout en dental hygienist pour kapab fer sir ki ledan nou bann dimoun ki dan prizon pe ganny mentenir e otan ki nou kapab kit bann prizonnyen an bonn sante i en gro benefis pour Minister Lasante ek prizon li menm,» Msye Tirant ti konklir.
Dantis ki baze dan sa klinik i Robert Ernesta avek son asistan, ners Marylyn François.
Dantis Ernesta ki byen koni pour son letan kot klinik Anse Royale, pe fer sa metye depi 1995. I annan 19-an depi ki i pe travay avek prizonyen dan bann diferan prizon tel ki L’Ile Longue, Grand Police, Marie Louise, Coetivy ek Montagne Posée limenm.
I pe swete ki dan 2-an i pou’n kapab met kontrol avek problem ledan dan prizon.
«Koman en dantis mon’n fer 11-an Anse Royale e sa i en gran klinik. Laba mon’n reisi annan kontrol lo mon bann pasyan e se sa ki mon anvi anmennen dan prizon. Savedir mon pou met en plan travay kot mon pou fer check-up tou bann prizonyen pour mwan kapab idantifye bann servis ki zot bezwen. Dan 2-an nou anvi ki prizon i fini anba kontrol kot ledan i konsernen,», i ti dir.
Sa klinik danter Montagne Posée pou osi edik bann prizonyen lo lafason ki zot bezwen okip zot ledan ek zot lasante labous e pour dekouraz zot pran bann sibstans ki gat zot ledan, sirtou sigaret.
Source : Seychelles NATION