Dan kad lazournen mondyal pour liv ek drwa doter, Lenstiti Kreol pe organiz en latelye literatir pour bann zanfan lekol segonder.
Sa aktivite pou fer demen – le 28 avril – kot Lenstiti Kreol, Au Cap e i pou enkli partisipasyon bann ekriven Seselwa ase koni nasyonalman e enternasyonalman pour zot travay dan bann diferan zanr literer respektif .
Aktivite pou deroul dan laform bann mini latelye kot bann zanfan pou ganny groupe dapre zot preferans literer e bann ekriven pou azir koman fasilitater dan sak group, kot zot pou partaz zot leksperyans avek bann zelev e eksplik zot bann prosede ki zot pas atraver letan ki zot pe ekrir en louvraz.
Bann latelye pou swiv par en sesyon lekritir lib ouswa dirize kot bann partisipan pou servi sa ki zot in aprann pour prodwir bann teks dan bann diferan zanr.
Bann zanr literer ki pou ganny aborde i enkli: Lapoezi, resi foklorik, resi kontanporen, resi syantifik, roman ek tradiksyon.
Latelye pou regroup partisipasyon trwa zanfan dan sak lekol segonder dan pei, akonpannyen par en ansenyan.
Source : Seychelles NATION