Fodre met lanfaz lo valer pour larzan lo bann proze kominoter ek amelyorasyon servis, Minis pour Zafer Sosyal, Devlopman Kominoter ek Sport Vincent Meriton in dir.
Minis Meriton ti dir sa Vandredi apre ki i ti’n vizit diferan proze kominoter dan distrik Grand Anse Mahé, Anse Boileau ek Anse Royale.
Bi sa bann proze se pour fer lavi bann zabitan pli agreab.
«Nou bann zabitan i annan en drwa lezitim pour zot kapab ganny lespas pour zot detann atraver bann fasilite kominoter, pour fasilit akse avek zot lakaz e osi anmenmtan gete ki mannyer zot kapab kontribye atraver bann progranm dan devlopman kominoter,» i ti dir.
I ti dir ki avek sa drwa i vin en lobligasyon ki gouvernman i annan e sa vizit Vandredi ti form parti bann promes ki Prezidan ti dir i pou realize pandan premye 100 zour son manda.
«Premye 100 zour in pase e nou pe met lanfaz lo servis, ki mannyer gouvernman i kapab kontinyelman amelyor servis ki i donn son popilasyon. Sa R30 milyon ki nou depanse toulezan pour bann pti proze kominoter i en bon sonm larzan e nou bezwen valer pour larzan,» i ti dir.
Minis Meriton ti osi demande ki plis bann pti kontrakter i ganny anmennen lo bann proze en fason ki bann responsabilite i ganny byen partaze ant sa bann kontrakter e ava napa retar dan sa bann proze.
«Ler ou annan en sel kontrakter i diviz sa pti lakantite zonm ki i annan atraver sa bann proze ou vwar en ta retar ki arive,» i ti dir.
I pe osi anvoy en responsabilite lo bann zabitan pour ki zot respekte e donn en koudmen pour mentenir sa bann fasilite atraver gard sa landrwa prop pour garanti son soutenabilite e pour kapab limit bidze ki ganny servi anmezir ki gouvernman i reprioritiz son bann depans.
Minis ti ganny akonpannyen par son konseye spesyal Dan Frichot.
I ti al vwar baraz laplenn foutbol Grand Anse Mahé ki ti konplete an Novanm lannen pase. Sa baraz i mezir 150 met longer e i’n kout R250,000.
Kontrakter sa proze ti Gabriel Monthy.
Minis ti osi vwar proze semen segonder Savy Estate ki mezir 30 met.
Kontrakter sa proze, Jean-Paul Boniface, i ekspekte fini konplet sa semen plitar sa lannen apre ki en drenaz, en baraz avek en lot bout semen i ganny azoute.
Ladministrater distrik Linette Dodin ti dir ki sa proze semen pou benefisye sa 4 a 5 lakaz vi ki ti annan en problenm blokaz e sa baraz otour laplenn i retir risk aksidan ki kapab arive ler boul i tonm dan semen.
Dan son vizit Anse Boileau Minis ti vwar de semen segonder, enn Caiman Estate ek lot Grand Bois e se Young Kong Construction ki’n ganny sa kontra.
Sa semen 45 met dan Caiman Estate in kout anviron R68,000 e i pe benefisye en kominote 15 lakaz.
Gonzalves Pool, ki parmi sa bann zabitan ki pe benefisye atraver sa semen, ti dir ki dan sa kominote i annan de twra dimoun ki aze e sa semen beton i ed zot en kantite.
In zwe son rol pour fer sir ki bann kontrakter ti byen fer zot louvraz e in byen apresye rezilta.
I ti dir ki i pou fer sir ki zot gard sa semen dan en bon leta.
«Ozordi mon kontan mon semen, mon maintain li, mon netwaye e la mon’n ganny enpe vetiver pour mwan plant lo son rebor pour letan lapli i tonbe,» i ti dir.
Solange Pool pe osi benefisye atraver sa proze vi ki i annan en pti biznes vey zanfan e sa i fasilit bann paran pour anmenn zot zanfan dan transpor menm si lapli pe tonbe.
Sa lot semen sitie Grand Bois i ankor anba konstriksyon me i ekspekte fini an Me sa lannen.
I en tre gran proze ki anviron 400 met longer e pou kout R1.7 milyon.
Manm parlman pour Anse Boileau Bernard Arnephy ti dir ki lontan sa proze Grand Bois i lo zot azanda me pour rezon difikilte tel ki permisyon in fer li pran enpe letan.
«Son striktir semen in fini, la nou pe negosye avek SLTA pour zot met koltar lo la e sa pou benefisye anviron en dizenn fanmir ki reste pli o. Sa pou osi ouver plizyer loportinite akoz i annan en kantite later anler ki kapab ganny devlope pour rezidansyel, menm biznes touristik ek lagrikiltir,» i ti dir.
Minis Joel Morgan, dan son kapasite konman reprezantan distrik Anse Royale lo komite santral, ti zwenn sa delegasyon pour kontiny sa vizit e parmi bann proze ki i ti vizite ti en trotwar ki pe ganny konstrir depi Sweet Escott ziska kot laboutik Sekaar. I pou kout anviron R3.9 milyon ler in fini konplete.
Minis Morgan ti dir ki sa proze trotwar ava elimin sa bann danze ki bann zabitan in fer fas avek dan lepase akoz in arive ki dimoun in tonbe dan sa landrwa.
«I en proze ki tre enportan pour lakominote, lontan nou pe esper nou mwayen pour nou kapab fer li e i ava deservi en gran nonm lakaz tou dilon e i asire ki bann pyeton, sirtou bann dimoun ki reste dan sa landrwa, zanfan ki pe al lekol, bann dimoun ki pe al anler dan wellness centre e sa gran kominote anler la dan sa landrwa dan zanmerant, i kapab ganny akse ki pa met zot an danze,» i ti dir.
Lot proze i en semen beton lo semen Young Kong sitie Santa Maria, Anse Royale.
Sa semen ki en longer 95 met in kout en sonm R168,000 e i pe benefisye en kominote 10 lakaz.
En lot semen segonder pe osi ganny fer pour benefisye anviron 30 fanmir Ex- Bradley.
Sa semen ki ti konmans konstrir an Oktob 2015 pe kout anviron R6.8 milyon.
Tou le trwa sa bann proze pe ganny fer par Lazans Transpor Lo Later (SLTA).
Minis Morgan ti ganny akonpannyen lo son vizit par sef egzekitiv SLTA Parinda Herath, bann teknisyen sa lazans, ladministrater distrik Jim Roy Jeanne-Paul, manm parlman Dereck Samson.
Bann portre ki akonpanny lartik i montre Minis Morgan ek Minis Meriton ek zot delegasyon pandan zot vizit.
Source : Seychelles NATION