Image may be NSFW.
Clik here to view.
Image may be NSFW.
Clik here to view.
Pandan son vizit lo bann zil pros, Minis pour Lazenes, Sport ek Kiltir, Mitcy Larue, ti osi vizit bann fasilite kiltir lo sa de zil. Sa i avek bi familyariz li ek sa departman ensi ki vwar bann konstrent ki zil pros i fer fas avek.
Pour akonpanny minis lo sa vizit ti sekreter prensipal pour departman kiltir, Cecile Kalebi; sef egzekitif Konsey Nasyonal pour Lar, Jimmy Savy; sef egzekitif CINEA, Galen Bresson; lezot o zofisye sa minister; manm Lasanble Nasyonal pour distrik Grand Anse, Wavel Woodcock e manm Lasanble Nasyonal pour Baie Ste Anne, Churchill Gill.
Lo La Digue sa delegasyon ti vizit Rita Morel, en zenn artis lar vizyel ki’n mont son galeri L’Union Estate. Rita ti ganny sans montre zot serten son travay ensi ki travay lezot artis ki ti an egzibit e diskit en pti pe lo son bann konsern. Sa ti enkli son dezapwentman anver bann lazans vwayaz ki i santi ti kapab enkli vizit kot son galeri pandan zot vizit L’Union Estate. Sa ti ava donn sans bann touris vwar travay artistik bann Seselwa e petet ankouraz zot pour aste enn konman souvenir.
En lot konstrent ti bann letablisman touristik ki prefere servi bann tablo ki zot enporte aletranze olye bann lokal.
Lo Praslin sa delegasyon ti osi vizit artis lar vizyel Alain Marie ek Studio Island Vibrations, enn bann pli gran benn lo Praslin. La ankor sa de artis ti met a latansyon sa delegasyon zot bann konstrent tel ki mankman en landrwa kot bann artizan i kapab egzibit zot travay pour lavant e en stad mizikal lo Praslin.
“Pandan sa vizit nou’n ganny sans vwar bann diferan difikilte ki bann artis i fer fas avek. Deza nou ti’n konmans diskisyon avek Minister Tourism e nou ava entansifye sa, pour vwar ki mannyer nou kapab fer bann letablisman touristik donn plis valer nou bann prodwi lokal e servi zot dan zot letablisman. Lezot minister konsernen ava osi ganny aprose pour vwar bann meyer solisyon pour bann konstrent ki bann artis pe fer fas avek. Mon konnen ki bann artis zil pros i annan bokou talan ek potansyel e nou kapab kolabor ansanm pour reviv nou kiltir,” Minis Larue ti partaze.
Bibliotek Nasyonal Baie Ste Anne ki sitie akote lopital Baie Ste Anne ti osi ganny vizite. E la pli gro konstrent i en mank lespas. I deza annan propozisyon pour lagrandisman sa letablisman me vi ki i ganny trouve dan en batiman ki tonm anba departman sport, diskisyon ava ganny fer pour vwar si i meyer bouz sa bibliotek dan en konpletman nouvo landrwa olye agrandi. Par kont sa bibliotek i byen ganny frekante malgre son grander, sirtou par bann zofisye medikal ek etidyan lekol pour bann resers.
Grand Anse Praslin li i annan en nouvo bibliotek bokou pli gran e pli modern ki trouve dan batiman fon pansyon. Menm si zot plito ganny vizit bann zanfan lekol Grand Anse primer ki zis akote sa letablisman, bann travayer sa bibliotek in remark en bes dan lentere pour lir e servi sa fasilite. Osi lefet ki zot lo premye letaz sa batiman i fer zot dezavantazye pour atrakte dimoun e menm limit akse pour bann dimoun avek serten dezabilite. Minis in sizere ki seksyon zanfan sa bibliotek i ganny transformen pour fer li pli atiran pour zanfan e osi lorganizasyon plis aktivite ki ava ede retourn sa kiltir lir dan nou fitir zenerasyon. En ‘media campaign’ ava osi ede pour fer kominote konn plis lo sa bibliotek ek bann diferan servis ki i ofer.
Bann artis ti osi ganny sa sans pour diskit ek sa delegasyon dan en rankont. Praslin i deza annan son lasosiasyon artis, apele ‘Parfe’, e deza sa lasosiasyon pe fer bokou pour ede amelyor sitiasyon bann artis lo sa zil. La Digue in ganny ankouraze pour form son lasosiasyon menm si i deza annan en group artis ki pe deservi en pti pe sa rol. Parmi bann konstrent i bann letablisman touristik ki pe servi bann benn etranze pour ‘entertainment’ ou menm pey bann benn Seselwa tre pe. Posibilite pour bann artis ganny en ‘license’ ki ava ede pour kontrol standar, regilariz zot bann aktivite e osi pri de baz ki zot dwatet ganny peye par bann letablisman touristik.
Sizesyon pour konstriksyon en Vilaz Lar, Amitie, Praslin, akote erport ti osi ganny releve. Sa i ava en lespas kot bann artis a kapab montre e vann zot prodwi dan en morso e lot ava ganny servi konman en Stad Lanmizik. Sa proze ki ti deza an diskisyon i ava a benefis lakominote Praslin an antye. Lasosiasyon ‘Parfe’ in ganny demande pour travay lo en propozisyon detaye pour sa proze e remet avek minis pour plis aksyon.
Propozisyon pour lorganizasyon en deba nasyonal ki ava ede soulev lenportans nou kiltir ti osi ganny fer e bann artis ti demann en balans ant sport ek kiltir vi ki zot santi ki souvannfwa, kiltir i tro ganny kit deryer.
En lot konstrent ki bokou bann artis i fer fas avek i finansman kar zot ganny difikilte pour kapab ganny en “loan” avek bann labank komersyal pour aste bann lekipman vi ki zot napa en saler garanti. Minis in donn son langazman pour vwar ek bann lezot lotorite konsernen pour annan serten progranm ki ava fasilit sa. Sizesyon pour annan reprezantan sa departman anploye lo zil pros ti osi ganny fer.
Departman kiltir, parey departman sport ek lazenes, ti osi sezi loportinite pandan sa vizit pour vwar bann lezot plas potansyel ki ava kapab benefisyel pour bann aktivite kiltirel tel ki sant kominoter Anse Boudin ek Anse Kerlan e bann konpleks sportif. Sa i touzour avek vizyon pour anmenn sa trwa konponan pour travay an pli etrwat kolaborasyon.
Teks: Nadia Bedier
Portre: Romano Laurence
Source : Seychelles NATION